ಆರಂಭದ ದಿನಗಳಲ್ಲಿ ಸಂಸ್ಥೆಯ ಸಂಸ್ಥಾಪಕರುಗಳು, ಸದಸ್ಯತ್ವ ಹೆಚ್ಚಿಸುವ ಸಲುವಾಗಿ ವಾರ್ಷಿಕ ರೂ. 12 ಸದಸ್ಯತ್ವ ಶುಲ್ಕ ನಿಗದಿಪಡಿಸಿ ಕಲಾಭಿಮಾನಿ ಸಾರ್ವಜನಿಕರನ್ನು ಸಂಪರ್ಕಿಸಿ ಸದಸ್ಯತ್ವ ಪಡೆಯಲು ಮನವೊಲಿಸುತ್ತಿದ್ದರು. ಕಾಲಕ್ರಮೇಣ ಸಂಸ್ಥೆಯ ಜನಮನ್ನಣೆಯ ಮತ್ತು ಸಾರ್ವತ್ರಿಕ ಮೆಚ್ಚುಗೆಯ ಕಾರ್ಯಚಟುವಟಿಕೆಗಳಿಂದಾಗಿ, ಯಕ್ಷಗಾನದಲ್ಲಿ ಶ್ರದ್ಧೆ ಮತ್ತು ಅಭಿಮಾನ ಉಳ್ಳವರು ಸ್ವಇಚ್ಚೆಯಿಂದ ಮುಂದೆ ಬಂದು ರೂ 1000 ( ಪ್ರಸಕ್ತ ರೂ.2000. ) ಶುಲ್ಕವನ್ನು ಪಾವತಿಸಿ ಯಕ್ಷಗಾನ ಕಲಾರಂಗದ ಅಜೀವ ಸದಸ್ಯರಾಗುತ್ತಿರುವುದು ಸಂತಸದ ವಿಚಾರವಾಗಿದೆ. ಇದರ ಪರಿಣಾಮವಾಗಿ ಕಲಾರಂಗದ ಕಾರ್ಯಕ್ರಮಗಳ ಯಶಸ್ಸಿಗೆ ಮೌನವಾಗಿ ಕೆಲಸ ಮಾಡುವ ಮತ್ತು ಪ್ರೋತ್ಸಾಹಿಸುವ ಸ್ವಯಂ ಸೇವಕರ ತಂಡವು ದೊಡ್ಡ ಪ್ರಮಾಣದಲ್ಲಿ ಬೆಳೆಯುವಂತಾಯಿತು. ಹಾಗೂ ಸಂಸ್ಥೆಯ ಅಭಿವೃದ್ಧಿ ಜೊತೆಗೆ ಯಕ್ಷಗಾನ ಕಮ್ಮಟಗಳನ್ನು, ವಿದ್ಯಾಪೋಷಕ್ ವಿದ್ಯಾರ್ಥಿಗಳಿಗೆ ಬೇಸಿಗೆ ವಸತಿ ಶಿಬಿರಗಳ ಆಯೋಜನೆ ಮೊದಲಾದ ವಿವಿಧ ಚಟುವಟಿಕೆಗಳನ್ನು ಆಯೋಜಿಸಲು ಅನುವು ಮಾಡಿಕೊಟ್ಟಿತು.

ಇಂದು ಬಹು ಎತ್ತರದ ಸಾಧನೆಯನ್ನು ಸಾಧಿಸಿ ಪ್ರತಿಷ್ಠಿತ ಸಂಸ್ಥೆಯಾಗಿ ಯಕ್ಷಗಾನ ಕಲಾರಂಗವು ನಿಯಮಾನುಸಾರ ನೋಂದಣೆಗೊಂಡು, (ಯುಡಿಪಿ – ಎಸ್ 68 – 1985-86) ಪಾರದರ್ಶಕ ವ್ಯವಹಾರ (ಪಾನ್ ಸಂಖ್ಯೆ. ಎಎಎಎವೈ0510ಎ) ಮತ್ತು ಸೇವೆಯಿಂದಾಗಿ ಸಮಾಜದ ವಿಶ್ವಾಸಕ್ಕೆ ಪಾತ್ರವಾಗಿ ಬೆಳೆದು ನಿಂತಿದೆ. ದಾನಿಗಳು ನೀಡುವ ದಾನಶುಲ್ಕಕ್ಕೆ ಆದಾಯ ತೆರಿಗೆಇಲಾಖೆಯ 80 ಜಿ. ಸೌಲಭ್ಯವಿದೆ. (ಎಫ್ ಸಿ ಆರ್ ಎ ನೋಂದಣೆ ಸಂಖ್ಯೆ. 094690028/ 2010 )